Igl auto da posta colligia Vuorz cun la reit d'autos da posta naven da Glion e culla Viafier Retica. Dalla sortida dalla via cantunala A19 denter Rueun e Tavanasa porta Vus ina beinmantenida via da muntogna el vitg da Vuorz, a Curtginet tier la staziun da val dallas pendicularas ed ad Andiast. La via ei carrabla cun autos entochen 18 tonnas e 2.5m ladezia.

Sche Vus meis cun la miur sur la carta ora (ed haveis buca deactivau javascript), veseis Vus ina part dils cunfins dalla vischnaunca da Vuorz. Nus supplichein per pazienzia duront cargar, quei maletg ha 70kb.

Naven da Vuorz eis ei mo dus pass entochen Sumvitg sco punct da partenza per la planira aulta dalla Greina ni per la caplutta da Zumthor a Sogn Benedetg, a Versomi ella Ruinaulta, ella Val Stussavgia romantica e spuretga, a Val S. Pieder el bogn termal, sur il Lucmagn el Tessin (stad ed unviern), a Realp per in viadi cun la viafier a vapur sur il Furca e sper il Glatscher dil Rodan ora, ni a Trun, el center dalla cultura Grischun e patria dil pictur artist Alois Carigiet e da siu frar Zarli. Ultra digl agen territori da skis e da snowboard Breil-Vuorz-Andiast contonsch’ins ils territoris da skis dall’Arena dallas Alps, Sursaissa/Mundaun, Val, Mustér e Sedrun en 15 tochen 40 minutas.